2025-жылдын 26-мартында Бишкекте “InKoom – Кыргызстанда адилеттүү жана инклюзивдүү коомду өнүктүрүүгө көмөк көрсөтүү” долбоорунун жыйынтыктары чыгарылды. Долбоорду Европа Биримдигинин финансылык колдоосу менен “Социалдык технологиялар агенттиги” Коомдук бирикмеси ишке ашырды.
Долбоор 2022-жылдын октябрынан 2025-жылдын мартына чейин ишке ашырылып, аялдарга, жаштарга жана балдарга, айрыкча майыптыгы бар адамдарга карата зомбулуктун жана басмырлоонун деңгээлин азайтууга багытталган. Инклюзивдүү ыкмаларга колдоо көрсөтүп, гендердик өңүткө басым жасаган журналистиканы өнүктүрүү, мамлекеттик органдардын жана жарандык коомдун дараметин күчөтүү долбоордун көңүл чордонунда болду.
Негизги жетишкендиктер:
- Мамлекеттик түзүмдөрдүн 900 өкүлү жана активисттер майыптыгы бар кыз-келиндердин укуктарын коргоонун өзгөчөлүктөрүнө окутулду;
- 300 журналист жана медиа-адистер инклюзивдүү, гендердик өңүткө басым жасаган журналистиканын стандарттарына окутулду;
- 30дан ашык маалыматтык-билим берүү өнүмдөрү, анын ичинде видео жана ар кандай басылмалар даярдалды;
- Медианын, инклюзиянын жана майыптыгы бар кыз-келиндерге карата зомбулуктун гендердик өлчөмү боюнча 3 ири изилдөө жүргүзүлдү;
- Майыптыгы бар 120дан ашык кыз-келин окутулуп, алардын ичинен 30дан ашыгы ишке орноштурулду;
- Адам укуктары, гендердик теңчилик жана инклюзия предметине медиа контентке мониторинг жүргүзүү боюнча InKoom веб-тиркемеси иштелип чыгып, InKoom тармагы түзүлдү. InKoom – бул эксперттердин, журналисттердин жана активисттердин жамааты;
- Адам укуктарына мониторинг жүргүзүп, инклюзивдүүлүктү сүрөө максатында республика боюнча 4500дөн ашык катышуучу, анын ичинде 3248 аял жана 1700 жаш адам тартылды;
- 90дон ашык иш-чара өткөрүлдү: тегерек столдор, тренингдер, конференциялар, жарманкелер, конкурстар ж.б.
Кыргыз Республикасынын Эмгек, социалдык камсыздоо жана миграция министринин орун басары Кыял Жанузакова өз сөзүндө Европа Биримдигинин Кыргыз Республикасындагы өкүлчүлүгүнө ыраазычылык билдирди. Ал белгилегендей, алардын жардамы менен Кыргызстанда гендердик теңчилик боюнча долбоорлор ишке ашырылууда.
“Гендердик теңчилик акыркы жылдардагы артыкчылыктуу маселелердин бири болуп саналат. Гендердик теңчиликке жетишүү 2040-жылга чейинки Улуттук стратегияда белгиленген.”
Долбоор ошондой эле 2025-2027-жылдарга гендердик теңчиликке жетишүү боюнча Улуттук иш-аракеттер планынын долбоорун талкуулап, иштеп чыгуу процессине эксперттик жана техникалык колдоо көрсөттү; Онлайн Аялдардын лидерлиги академиясын, гендердик теңчилик жөнүндө мыйзамдарды өркүндөтүү боюнча регионалдык жана улуттук консультацияларды өткөрдү.
“InKoom долбоору гендердик жана социалдык теңчиликти туруктуу негизде сүрөө үчүн мамлекеттин, жарандык коомдун, медианын жана эл аралык өнөктөштөрдүн ортосундагы кызматташуу канчалык маанилүү экендигин көрсөттү”, – деп белгилешти жыйынтыктоочу конференциянын жүрүшүндө уюштуруучулар.